Jabuuti (Dawan) — Madaxweynaha Soomaaliya Xasan Sheekh Maxamuud iyo Madaxweynaha Jabuuti Ismaaciil Cumar Geelle ayaa maanta oo Arbaco ah magaalada Jabuuti kaga wada hadlay xaaladda Itoobiya, xilli dagaallo cusub oo ka socda waqooyiga Itoobiya ay walaac ka abuureen amniga gobolka.
Xasan Sheekh ayaa subaxnimadii Arbacada gaaray Jabuuti, halkaas oo uu ku tagay booqasho shaqo oo looga gol lahaa xoojinta xiriirka iyo iskaashiga labada dal, sida ay sheegtay Wakaaladda Wararka Jabuuti ee ADI.
Kulanka ayaa ku soo beegmay xilli dagaallo cusub ay ka bilowdeen waqooyiga Itoobiya, halkaas oo ciidamo ka tirsan gobolka Tigray ay 23-kii Sebtembar weerar ballaaran ku qaadeen ciidamada dowladda federaalka. Dagaallada ayaa sidoo kale laga soo sheegay gobollada deriska la ah ee Canfarta iyo Amxaarada, taas oo sare u qaaday walaaca laga qabo in colaadda ay sii ballaarato.
Xiisadda ayaa timid kaddib markii la dhisay Ethiopian Peoples’ Forces Alliance for Survival, oo ah isbahaysi ay ku mideysan yihiin toddobo kooxood oo hubeysan, oo ay ku jiraan Tigray People’s Liberation Front (TPLF), Amhara Fano National Movement iyo Oromo Liberation Army. Isbahaysiga ayaa sheegay inuu doonayo in xilka laga qaado dowladda Ra’iisul Wasaare Abiy Axmed, lana dhiso maamul ku-meel-gaar ah.
Dagaallada cusub ayaa sidoo kale walaac ka dhaliyay suurtagalnimada in colaadda Itoobiya ay sii ballaarato iyo saameynta ay ku yeelan karto dalalka deriska ah iyo marinnada ganacsiga ee gobolka.
