Kenya (Dawan ) – Wasaaradda Waxbarashada, Hiddaha iyo Tacliinta Sare ee Soomaaliya ayaa kala hadashay Jaamacadda Kenyatta iyo Jaamacadda Ummadda Soomaaliyeed hirgelinta barnaamijka deeqda waxbarasho ee heerka Master’s-ka ee haweenka, sida ay sheegtay wasaaraddu.
Kulanka ka dhacay Jaamacadda Kenyatta ee magaalada Nairobi, ayaa isu keenay guddiyo farsamo oo ka kala socday saddexda hay’adood, waxaana la filayaa inuu socdo muddo afar maalmood ah.
Barnaamijkan ayaa qeyb ka ah mashruuca “Rajo Kaaba”, oo ah mashruuc dhan $52 milyan oo uu maalgelinayo Bangiga Adduunka. Qorshahan deeqda waxbarasho ayaa si gaar ah loogu talagalay in 150 haween Soomaaliyeed lagu siiyo waxbarasho Master’s oo si buuxda loo maalgeliyay, iyadoo lagu baranayo maadooyin muhiim u ah dib-u-dhiska dalka sida waxbarashada, cilmiga deegaanka iyo maamulka dadweynaha.
“Kulankan ayaa diiradda lagu saari doonaa hawlgelinta iyo isku dubbaridka kooxaha farsamo, dib-u-eegista iyo waafajinta manhajka si uu ula jaanqaado duruufaha iyo baahiyaha dalka,,” ayay Wasaaradda Waxbarashada Soomaaliya ku sheegtay bayaan ay soo saartay.
