Nairobi (Dawan) – Hay’adda Maareynta Musiibooyinka Soomaaliyeed (SoDMA) iyo Ururka Laanqeyrta Cas ee Kenya ayaa magaalada Nairobi ku kala saxiixday heshiis saddex sano ah oo lagu xoojinayo iskaashiga labada dhinac ee dhanka maareynta musiibooyinka.
Heshiiska waxaa saxiixay Guddoomiyaha SoDMA, Maxamuud Macallin Cabdulle, iyo Xoghayaha Guud ee Laanqeyrta Cas ee Kenya, Axmed Idris.
Labada dhinac ayaa ku heshiiyey in la horumariyo nidaamyada digniinta hore, lana xoojiyo falanqaynta khataraha, isla markaana la ballaariyo wadaagga xogta la xiriirta cimilada iyo xaaladaha degdegga ah ee saameeya bulshooyinka ku nool deegaannada xuduudda.
Sidoo kale, heshiiska ayaa diiradda saaraya xoojinta tababarrada howlwadeenada gurmadka degdegga ah, kaydinta agabka gargaarka iyo tayeynta awoodda kooxaha ka jawaaba musiibooyinka, si loo dardargeliyo wax ka qabashada xaaladaha degdegga ah.