Muqdisho (Dawan)— Soomaaliya iyo Masar ayaa ka wada hadlay xoojinta iskaashiga dhinacyada maalgashiga, ganacsiga iyo horumarinta dhaqaalaha, kaddib kulan dhexmaray Agaasimaha Guud ee Hay’adda Maalgashiga Soomaaliya iyo Safiirka Masar ee Soomaaliya sida ay sheegtay maanta oo Arbaco ah Hay’adda Maalgashiga Soomaaliya.
Agaasimaha Guud ee Hay’adda Maalgashiga Soomaaliya, Feysal Aadan Xasan, ayaa Muqdisho kula kulmay Safiirka Masar, Mohamed Salah Keshtah, iyadoo labada dhinac ay ka wada hadleen fursadaha lagu ballaarin karo xiriirka dhaqaale iyo maalgashi ee labada dal.
Kulanka ayaa sidoo kale diiradda lagu saaray Madasha Ganacsiga Afrika ee Alamein, oo lagu qabanayo magaalada Alamein ee Masar 2 ilaa 4 Oktoobar, iyo ka-qaybgalka Soomaaliya ee madasha, gaar ahaan doorka Hay’adda Maalgashiga Soomaaliya.
