Muqdisho (Dawan)- Soomaaliya iyo Masar ayaa xoojinaya iskaashiga dhinaca hantidhowrka, iyadoo labada dal ay xoogga saarayaan horumarinta awoodda lagu ilaalinayo hantida dadweynaha iyo lagu ogaanayo qiyaanada iyo wax-is-daba-marinta maaliyadeed.
Xafiiska Hantidhowrka Guud ee Soomaaliya iyo Hay’adda Hantidhowrka Guud ee Masar ayaa Muqdisho ka wada aqoon-is-weydaarsi afar maalmood ah oo cinwaankiisu yahay “Istaraatiijiyadaha iyo Xirfadaha Ogaanshaha Xadgudubyada Maaliyadeed.” Tababarka oo soconaya 14 ilaa 17 Sebtembar 2026 ayaa diiradda lagu saarayaa ogaanshaha khaladaadka maaliyadeed, qiimeynta khataraha wax-is-daba-marinta, iyo hababka baarista iyo ururinta caddeymaha la xiriira xadgudubyadaas.
Ku-xigeenka Hantidhowraha Guud ee Soomaaliya, Mukhtaar Maxamed Abuukar, oo furay aqoon-is-weydaarsiga, ayaa sheegay in dhisidda awoodda hantidhowrayaasha ay muhiim u tahay ilaalinta hantida dadweynaha. “Xoojinta awoodda Hantidhowrayaasha ee ogaanshaha xadgudubyada maaliyadeed iyo khataraha qiyaanada waa qayb muhiim ah oo ka mid ah ilaalinta hantida dadweynaha,” ayuu yiri Mukhtaar.