Muqdisho (Dawan)– Soomaaliya iyo Pakistan ayaa ka wada hadlay inay xoojiyaan iskaashiga dhinaca difaaca cirka, tababarka ciidamada iyo horumarinta awoodda Ciidanka Cirka Soomaaliyeed.
Arrintan ayaa looga hadlay kulan uu Madaxweynaha Soomaaliya Xasan Sheekh Maxamuud ku qaabilay wafdi sare oo ka socday Ciidanka Cirka Pakistan, kaas oo uu hoggaaminayay Taliyaha Difaaca Cirka, ahna Taliye Ku-xigeenka Ciidanka Cirka Pakistan, Air Marshal Muhammad Sarfraz.
War-saxaafadeed ka soo baxay Ciidanka Xoogga Dalka ayaa lagu sheegay in Kulanka si gaar ah diiradda loogu saaray dardargelinta dhismaha Ciidanka Cirka Soomaaliyeed, sare u qaadista tayada iyo xirfadaha ciidanka iyo xoojinta awoodda Soomaaliya ee ilaalinta hawadeeda.
Waxaa kulanka ka qeyb galay Wasiirka Gaashaandhigga Axmed Macallin Fiqi, Taliyaha Ciidanka Xoogga Dalka Sareeye Guuto Ibraahim Maxamed Maxamuud iyo Taliyaha Ciidanka Cirka Soomaaliyeed Sareeye Guuto Cabdirisaaq Maxamuud Xaaji.