Muqdisho (Dawan) – Soomaaliya iyo Qadar ayaa ka wada hadlay xoojinta iskaashiga dhaqaale iyo maalgashi, iyo sahminta fursado ka jira dhinacyo dhowr ah intii uu Muqdisho ka socday kulan, sida ay sheegtay Wasaaradda Qorsheynta, Maalgashiga iyo Horumarinta Dhaqaalaha Soomaaliya Talaadadii.
Agaasimaha Guud ee Wasaaradda, Cabdifataax Cabdiqaadir Faarax, ayaa xarunta wasaaradda ku soo dhaweeyay wafdi horumarineed iyo maalgashi oo ka socday Qadar, kaas oo uu hoggaaminayay Talal bin Rashid Al-Hajri, oo ah la-taliye sare iyo kaaliyaha agaasimaha Waaxda Arrimaha Carabta ee Wasaaradda Arrimaha Dibadda Qadar.
Wafdiga ayaa waxaa ka mid ahaa wakiillo ka socday hay’adaha dowladda Qadar, shirkado ka shaqeeya cuntada iyo beeraha, Sanduuqa Horumarinta Qadar, iyo shirkad ku takhasustay agabka caafimaadka, sida ay sheegtay wasaaradda.
