Muqdisho (Dawan) – Wasaaradda Hawlaha Guud, Dib-u-dhiska iyo Guriyeynta Soomaaliya ayaa sheegtay in wafdi ka socda dowladda Soomaaliya oo uu hogaaminayo wasiir Ayuub Ismaaciil Yusuf uu kulan la yeeshay Wasiirka Gaadiidka iyo Kaabayaasha Dhaqaalaha ee Turkiga, Abdulkadir Uraloğlu, iyadoo diiradda lagu saaray xoojinta iskaashiga labada dal ee dhinacyada kaabayaasha dhaqaalaha, guriyeynta iyo mashaariicda ay ka qeyb qaadanayaan shirkadaha gaarka loo leeyahay.
Kulanka, oo ka dhacay xarunta Wasaaradda Gaadiidka iyo Kaabayaasha Dhaqaalaha ee Turkiga, ayaa lagu falanqeeyay sidii Soomaaliya iyo Turkiga u horumarin lahaayeen mashaariic wadajir ah oo taageera horumarka waara, gaar ahaan dhismaha kaabayaasha muhiimka ah iyo guriyeynta.
Wasaaradda Hawlaha Guud ee Soomaaliya ayaa sheegtay in labada dhinac ay sidoo kale ka wada hadleen doorka shirkadaha gaarka loo leeyahay ee hirgelinta mashaariicda waaweyn, iyo sidii loo xoojin lahaa hannaanka iskaashiga dowladda iyo ganacsatada, ee loo yaqaan Public-Private Partnership PPP.
