Soomaaliya iyo UK oo ka wada hadlay xoojinta iskaashiga labada dal

Muqdisho (Dawan)— Madaxweynaha Soomaaliya Xasan Sheekh Maxamuud ayaa Talaadadii Madaxtooyada Soomaaliya ku qaabilay Wasiiru-dowlaha Boqortooyada Midowday u qaabilsan Horumarinta Caalamiga ah iyo Afrika, Kirsty McNeill, iyadoo labada dhinac ay ka wada hadleen xoojinta xiriirka iyo iskaashiga Soomaaliya iyo UK.

Sida ay sheegtay Villa Soomaaliya, kulanka ayaa diiradda lagu saaray arrimaha ay labada dhinac wadaagaan, mudnaanta labada dowladood iyo fursadaha lagu sii horumarin karo iskaashiga laba geesoodka ah.

Madaxweyne Xasan Sheekh Maxamuud ayaa kulanka ku adkeeyay muhiimadda ay Soomaaliya u leedahay taageerada iyo iskaashiga ay la leedahay Boqortooyada Midowday, oo kamid ah saaxiibada muhiimka ah ee Soomaaliya.

Labada dhinac ayaa sidoo kale isla eegay fursadaha lagu xoojin karo wada shaqaynta dhinacyada kala duwan, iyadoo la adkeynayo xiriirka u dhexeeya labada dal.

Villa Soomaaliya ayaa sheegtay in dowladda iyo shacabka Soomaaliyeed ay si weyn u qiimeeyaan Boqortooyada Midowday oo ay ku tilmaantay lamaane muhiim ah oo kaalin ka qaata horumarka Soomaaliya.

Kulankan ayaa kusoo beegmaya xilli Soomaaliya ay waddo dadaallo lagu xoojinayo xiriirka iyo iskaashiga caalamiga ah, gaar ahaan dhinacyada horumarinta, dowlad-dhiska iyo taageerada hay’adaha dowladda, iyadoo UK ay kamid tahay saaxiibada muhiimka ah ee Soomaaliya.