Soomaaliya iyo Urdun oo ballaarinaya iskaashiga milatari

Labada dhinac ayaa ka wada hadlay tababarrada, tayeynta ciidamada, is-weydaarsiga khibradaha iyo xoojinta iskaashiga difaaca ee Soomaaliya iyo Urdun.

July 15, 2026

2 daqiiqo akhris

Waxaa qoray Cabdullaahi Salaad - Reporter

Cammaan (Dawan) – Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa kulan la yeeshay Taliyaha Ciidamada Qalabka Sida ee Boqortooyada Urdun, Sarreeye Gaas Yuusuf Axmed Al-Xuneyti, iyagoo ka wada hadlay xoojinta iyo ballaarinta iskaashiga ciidan ee u dhexeeya Soomaaliya iyo Urdun, gaar ahaan dhinacyada tababarrada, tayeynta ciidamada, is-weydaarsiga khibradaha iyo la-dagaallanka argagixisada.

Kulanka oo Talaadadii ka dhacay xarunta Taliska Guud ee Ciidamada Qalabka Sida ee Urdun ee magaalada Cammaan ayaa qayb ka ahaa booqasho rasmi ah oo Wasiir Fiqi iyo wafdi uu hoggaaminayo ay ku joogaan Boqortooyada Urdun.

Labada dhinac ayaa intii uu socday kulanka dib u eegay xaaladaha amni ee gobolka iyo caalamka, caqabadaha amni ee jira, iyo fursadaha lagu horumarin karo xiriirka difaaca ee labada dal.

Maqaallo la xidhiidha

1 saac kahor

Muqdisho oo lagu qabtay aqoon-isweydaarsi ku saabsan la-dagaallanka musuqmaasuqa

5 saac kahor

Caqabadihii iyo Guulihii Dilek Somalia: Sheeko Ganacsi oo Dhiirrigelin Leh

Wasiir Axmed Macallin Fiqi iyo Taliye Yuusuf Axmed Al-Xuneyti ayaa isku raacay muhiimadda ay leedahay in la joogteeyo wada-xiriirka iyo iskaashiga dhinacyada kala duwan ee ciidamada, si kor loogu qaado awoodaha difaaca, diyaargarowga hawlgallada iyo xasilloonida gobolka.

Taliyaha Ciidamada Qalabka Sida ee Boqortooyada Urdun, Sarreeye Gaas Yuusuf Axmed Al-Xuneyti, ayaa sheegay in Soomaaliya iyo Urdun ay leeyihiin xiriir wanaagsan, isla markaana iskaashiga milatari uu yahay tiir muhiim u ah xoojinta awoodaha difaaca, is-weydaarsiga khibradaha iyo taageeridda nabadda iyo xasilloonida gobolka.

Kulankan ayaa ku soo beegmaya xilli Dowladda Federaalka Soomaaliya ay waddo dadaallo lagu ballaarinayo iskaashiga difaaca ee ay la leedahay dalalka saaxiibka ah, si loo dhiso Ciidamada Xoogga Dalka Soomaaliyeed oo leh tababar, qalab iyo awood ay si buuxda ugula wareegi karaan mas’uuliyadda amniga dalka.

Maqaallo kale oo aan kuu doorannay

6 saac kahor