Muqdisho – 13 Abriil 2026 (Dawan)- Wasiirka Batroolka iyo Macdanta Soomaaliya, Daahir Shire Maxamed,, ayaa faahfaahin ka bixiyay qaabka heshiisyada shidaal qodista ee dalka, isaga oo meesha ka saaray walaacyo la xiriira in Soomaaliya laga dhacayo kheyraadkeeda, wuxuuna carrabka ku adkeeyay in heshiisyadu ku dhisan yihiin nidaam caalami ah oo loo yaqaan “heshiiska qeybsiga wax soo saarka” (Production Sharing Agreement).
Wareysi gaar ah oo uu siiyay barnaamijka Miizaan Podcast ee ka baxa Dawan Media, ayuu wasiirku ku sheegay in dunida casriga ah aysan jirin wax “lacag la’aan ah”, balse wax walba ay ku xiran yihiin masaalix iyo heshiisyo qeexaya xuquuqda dhinacyada.
“Maanta wax lacag la’aan ah dunida kama jiraan, wax walbana masaalix ayay ku xiran yihiin, balse heshiis ayaa xadeeya wax kasta,” ayuu yiri wasiirka.
Wasiir Daahir Shire ayaa sharraxay in heshiisyada shidaalka Soomaaliya ay ku saleysan yihiin nidaamka Production Sharing Agreement, kaas oo si cad u qeexaya sida loo qeybsanayo kharashaadka iyo faa’iidada shidaalka la soo saarayo.
“Xirmo kasta waxay leedahay heshiis qeexaya qeybsiga wax soo saarka, kaas ayaa wax walba faahfaahinaya,” ayuu yiri.
Isagoo ka hadlayay dhaliilaha sheegaya in Soomaaliya lagu khiyaamayo heshiisyada shidaalka, ayuu wasiirku si cad u beeniyay arrintaas, isaga oo sheegay in aysan jirin wax laga dhacayo Soomaaliya.
Wasiirka ayaa tusaale u soo qaatay qaabka maalgashiga loo sameeyo, isaga oo sheegay in shirkadaha shisheeye ay qaateen halista dhaqaale ee baarista iyo qodista shidaalka, halka dowladda Soomaaliya aysan wax kharash ah gelin marxaladda hore.
“Tusaale ahaan, haddii 300 milyan la gelinayo mashruuc, dowladda Soomaaliya ma dhihin annaga ayaa bixinayna lacagtaas si loo qodo. Shirkadaha dowladda Turkiga ayaa maalgelinaya,” ayuu yiri.
