Muqdisho (Dawan ) – Dowladda Federaalka Soomaaliya ayaa ansixisay Istiraatiijiyadda Qaranka ee La-dagaallanka Musuqmaasuqa (NACS 2026–2030), taas oo lagu doonayo in lagu xoojiyo hufnaanta hay’adaha dowladda, isla-xisaabtanka, iyo la-dagaallanka musuqmaasuqa dalka.
Qorshahan ayaa lagu ansixiyay kulan ay soo qabanqaabisay Wasaaradda Cadaaladda iyo Arrimaha Dastuurka, kaas oo 15-ka iyo 16-ka Abriil 2026 ka dhacay Muqdisho. Kulanka waxaa ka qeyb galay mas’uuliyiin ka kala socday dowladda federaalka, dowlad-goboleedyada, hay’adaha garsoorka, bulshada rayidka ah, iyo saaxiibada horumarinta.
Wasaaradda Cadaaladda iyo Arrimaha Dastuurka ayaa sheegtay in istiraatiijiyaddan ay daba socoto qorshihii hore ee 2020–2023, iyadoo lagu saleeyay dib-u-eegis dhammaad (End-Term Review) iyo qiimeyn ku saabsan khataraha musuqmaasuqa ee heer qaran (NCRA). Dowladda ayaa xustay in habkan uu gacan ka geysanayo dejinta qorshe ku saleysan xaqiiqooyin iyo falanqeyn.
