Muqdisho (Dawan)— Dowladda Soomaaliya ayaa ansixisay Qorshaha Qaran ee Dhalinyarada, Nabadda iyo Amniga ee 2026–2030, kaas oo ku kacaya $56 milyan, sida ay Wasaaradda Dhallinyarada iyo Ciyaaraha ku sheegtay war-saxaafadeed ay soo saartay Talaadadan maanta ah.
Ururrada ay dhalinyaradu hoggaamiyaan iyo wakiillo ka socday bulshada rayidka ah ayaa Isniintii magaalada Muqdisho ku qabtay shir lagu eegayay qabyo-qoraalka hore ee qorshaha, laguna ansixiyay mudnaanta, tallaabooyinka iyo tilmaamayaasha qorshaha, sida ay wasaaraddu sheegtay. Shirka ayaa ku beegnaa maalinta caalamiga ah ee nabadda.
Wasiirka Dhallinyarada iyo Ciyaaraha Maxamed Cabdulqaadir Cali ayaa saxiixay hordhaca qorshaha, iyadoo ay taageereen agaasimeyaasha guud ee dowlad-goboleedyada Soomaaliya, taas oo soo gabagabaysay hannaanka ansixinta heer qaran, sida ay wasaaraddu sheegtay.
Munaasabadda waxaa ka qeyb galay wakiillo dhalinyaro ah, wasaaradaha heer federaal iyo heer dowlad-goboleed, ururrada bulshada rayidka ah iyo hay’adaha Qaramada Midoobay..
Qorshaha shanta sano ah wuxuu ku dhisan yahay lix tiir: ka qeybgalka dhallinyarada ee dowladnimada iyo geeddi-socodka nabadda; ilaalinta iyo amniga; awood-siinta iyo shaqo-abuurka; ka hortagga colaadaha, cimilada iyo adkeysiga; iskaashiga iyo xoojinta hay’adaha; iyo ka bixitaanka kooxaha hubeysan iyo dib-u-dhexgalka bulshada.