Muqdisho (Dawan)– Ra’iisul Wasaare Ku-xigeenka Soomaaliya Saalax Axmed Jaamac ayaa ballanqaaday in dowladda ay qaadi doonto tallaabooyin lagu horumarinayo aqoonsiga rasmiga ah ee luqadda dadka maqalka la', isaga oo sheegay in hay’adaha ay khusayso lagu dhiirrigelin doono inay arrintan si degdeg ah wax uga qabtaan.
Khudbad uu ka jeediyay furitaanka Madasha Horumarinta Soomaaliya ee Saddexaad (SDF2026) maanta oo Talaadado ah ka dhacday Muqdisho, ayuu Jaamac ku sheegay in dowladda ay arrintan kala shaqeyn doonto Wasaaradda Waxbarashada iyo hay’adaha u xilsaaran xuquuqda aadanaha si loo dedejiyo geeddi-socodka aqoonsiga.
“Waxaan ballanqaadaynaa inaan ku dhiirrigelin doono hay’adaha dowladda ee ay khusayso inay arrintan sida ugu dhaqsaha badan wax uga qabtaan,” ayuu yiri Jaamac.
Hadalka Ra’iisul Wasaare Ku-xigeenka ayaa yimid kaddib codsi uu madasha ka jeediyay Muuse Xasan Axmed, oo ah wakiilka dadka baahiyaha gaarka ah qaba, kaas oo sheegay in maqnaanshaha aqoonsiga rasmiga ah ee luqadda dadka maqalka la' uu ka hor istaagayo dadka dhegoolayaasha ah inay si buuxda uga qayb qaataan doorashooyinka iyo nolosha guud ee bulshada.
Muuse ayaa sidoo kale sheegay in hindise lagu aqoonsanayo luqaddan uu yaallay Wasaaradda Waxbarashada muddo saddex sano ah, iyadoo aan weli go’aan laga gaarin.
