Muqdisho (Dawan)— Wasaaradda Gaashaandhigga Soomaaliya ayaa gaashaanka u daruurtay warbixin dhowaan ay soo saartay hay’adda International Crisis Group (ICG) oo ku saabsan Al-Shabaab, iyadoo ku tilmaantay mid khaldan, aan dheellitirnayn, isla markaana marin-habaabinaysa qiimeynta ay ka bixisay ololaha dalka ee lagula dagaallamayo kooxda.
Qoraal ay wasaaraddu soo saartay ayay ku sheegtay in warbixinta ICG, oo la daabacay 30-kii Juun, ay si khaldan u sheegtay in Al-Shabaab ay noqotay koox u nugul baahiyaha bulshada isla markaana hoos u dhigtay adeegsiga cabburinta. Wasaaraddu waxay sheegtay in aragtidaasi ay iska indhatirayso taariikhda dheer ee kooxda ee weerarrada iyo tacaddiyada ka dhanka ah shacabka Soomaaliyeed iyo ciidamada amniga.
Wasaaraddu waxay sheegtay in hoos u dhaca awoodda Al-Shabaab ee baadda ay uga qaadi jirtay ganacsatada, cabsi gelinta bulshada iyo dhaqdhaqaaqyadeeda xorta ah uu ka dhashay cadaadis milatari oo joogto ah oo ay wadeen Ciidamada Xoogga Dalka Soomaaliyeed, iyagoo garab ka helaya bulshada deegaanka iyo saaxiibbada caalamiga ah, halkii uu ka ahaan lahaa isbeddel ay kooxdu si iskeed ah u samaysay.
Sidoo kale, waxay ku eedeysay warbixinta inay iska indhatirtay naf-hurnimada ciidamada Soomaaliyeed ee u dagaallamay xoreynta deegaannada, burburinta shabakadaha Al-Shabaab iyo xoojinta amniga, gaar ahaan magaalada Muqdisho.
