Soomaaliya oo dalalka Carabta ka codsatay inay ka hor yimaadaan xiriir kasta oo sharci ahayn oo lala sameeyo Somaliland

Cammaan (Dawan) – Wasiiru Dowlaha Wasaaradda Arrimaha Dibadda iyo Iskaashiga Caalamiga ah ee Dowladda Federaalka Soomaaliya, Cali Maxamed Cumar (Cali Balcad), ayaa dalalka Carabta ugu baaqay inay ka hortagaan tallaabo kasta oo horseedi karta xiriir ama macaamil lala yeesho Somaliland oo aan sharci ahayn, oo ay Soomaaliya ku tilmaantay gobol ka tirsan Jamhuuriyadda Federaalka Soomaaliya.

Wasiirka ayaa hadalkan ka jeediyay furitaanka kalfadhiga 165-aad ee Golaha Jaamacadda Carabta ee heer wasiir, kaas oo lagu qabtay magaalada Cammaan ee dalka Urdun 22-kii Juun 2026.

Khudbaddiisa ayuu Cali Maxamed Cumar ku sheegay in Soomaaliya ay si weyn uga walaacsan tahay dhaqdhaqaaqyo iyo xiriirro ay ku tilmaantay kuwo sharci-darro ah oo lala sameynayo Somaliland, isagoo adkeeyay in gobollada Waqooyi Galbeed ay yihiin qayb aan ka go’i karin Jamhuuriyadda Federaalka Soomaaliya.

“Soomaaliya waxay si xushmad leh uga codsanaysaa dhammaan dowladaha Carabta inay hubiyaan inaan dhulkooda loo adeegsan fududeynta, maalgelinta, caadiyeynta ama sharciyeynta wax kasta oo macaamil lala yeesho gobolkan gooni-u-goosadka ah ee Waqooyi Galbeed,” ayuu yiri Wasiiru Dowlaha Arrimaha Dibadda.

Wuxuu sidoo kale ugu baaqay dalalka Carabta in aan nidaamyadooda maaliyadeed, shirkadahooda, dekedahooda, hay’adahooda iyo kanaallada kale ee ay maamulaan loo adeegsan taageeridda ama fududeynta xiriirro ay Dowladda Federaalka Soomaaliya u aragto kuwo aan sharci ahayn.

Dowladda Federaalka Soomaaliya ayaa sheegtay in arrintani ay si toos ah ula xiriirto ilaalinta mabda’a midnimada dhuleed iyo madaxbannaanida dalalka Carabta, isla markaana loo baahan yahay in laga hortago tallaabo kasta oo sharciyad siin karta dhaqdhaqaaqyada gooni-u-goosadka ah.

Khudbadda wasiirka ayaa sidoo kale lagu adkeeyay in Soomaaliya aysan raadineyn xiisad ama iska hor imaad siyaasadeed, balse ay xaq u leedahay difaacidda madax-bannaanideeda, midnimadeeda dhuleed iyo xuduudaheeda caalamiga ah ee la aqoonsan yahay.

Soomaaliya ayaa marar badan ku celcelisay mowqifkeeda ku aaddan ilaalinta midnimada dalka, iyadoo dalalka saaxiibka ah iyo ururrada caalamiga ah ugu baaqday inay ixtiraamaan madax-bannaanida iyo wadajirka dhuleed ee Jamhuuriyadda Federaalka Soomaaliya.