Muqdisho (Dawan)- Dowladda Federaalka Soomaaliya ayaa diiradda saaraysa xoojinta federaaleynta maaliyadda iyo hirgelinta isbeddelka dhaqaale ee dalka, iyada oo lala kaashanayo mas’uuliyiinta maaliyadeed ee dowlad goboleedyada iyo gobalka Banaadir.
Shir laba maalmood ka socday Muqdisho ayaa waxaa ka qayb galay Wasiirka Maaliyadda DFS, wasiirrada maaliyadda dowlad-goboleedyada, iyo gobolka Banaadir. Intii lagu guda jiray shirkan, waxaa laga wada hadlay sidii loo horumarin lahaa nidaamka canshuuraha, wax ka bedel lagu sameyn lahaa habraaca kabka miisaaniyadda, iyo sida loo qaybin lahaa deeqaha dibadda si siman oo hufan.
Wasiirka Maaliyadda, Biixi Imaan Cigge, ayaa sheegay in ajandaha ugu muhiimsan uu ahaa xoojinta habka federaaleynta maaliyadda, horumarinta dhaqaalaha dalka, iyo hagaajinta maamulka mushaaraadka shaqaalaha rayidka ah. Waxa uu intaa ku daray in go’aanno muhiim ah laga gaaray nidaaminta deeqaha dibadda iyo kabka miisaaniyadda ee dowlad-goboleedyada.
