Soomaaliya, 23 Sebteembar 2025 – Dowladda Soomaaliya ayaa Talaadadii dib ugu soo celisay dalka 184 muwaadin Soomaaliyeed oo ku sugnaa dalka Liibiya, kuwaas oo ku xirnaan xabsiyada liibiya oo ay ku heysatay xaaldo nololeed.
Soo celintaan ayaa waxaa si wadajir ah u fuliyay Wasaaradda Arrimaha Dibadda, howlagalka Midowga Yurub ee Soomaaliya iyo Ururka Caalamiga ah ee Socdaalka (IOM). Sida ay sheegtay wasaaraddu, 152 ka mid ah muhaajiriinta ayaa laga soo dajiyey Garoonka Caalamiga ah ee Aadan Cadde ee Muqdisho, halka 32 kalena laga dajiyey Garoonka Hargeysa.
Wasiir-ku-xigeenka Arrimaha Dibadda, Isaaq Mahmud Mursal, ayaa sheegay in hawlgalkan uu yahay tallaabo taariikhi ah oo muujinaysa waajibaadka dowladda ee ilaalinta muwaadiniinteeda. Wuxuu yiri: “Taariikh ahaan waa maalin ka duwan maalmaha kale, waayo soo badbaadinta dad tiro intan la eg oo ku jiray xaalado adag, oo noloshooda iyo sharafkooda wax u geysan lahayd inana dalka ku soo celinno annagoo gudanayna waajibaadkii naga saarnaa, guud ahaan Wasaaradda iyo hay’adaha dowladda iyo kuwa na kaalmaynayay.”
Ururka IOM ayaa sidoo kale ku tilmaamay soo celinta mid “nolosha badbaadinaysa”, iyagoo ku sheegay in muhaajiriinta loo abuuray fursad sharaf leh oo ay ku dhistaan mustaqbal rajo leh gudaha Soomaaliya.
Qaar ka mid ah dadka soo laabtay ayaa la wadaagay warbaahinta waaya-aragnimo xanuun badan oo ay kala kulmeen Liibiya. Gabar dhalinyaro ah oo la hadashay warbaahinta dowladda ayaa tiri: “Xaaladaha Liibiya aad bay u adkayd, waxaan ku faraxsanahay in aan si nabad ah ugu soo laabtay dalkayga.”
Wasaaradda Arrimaha Dibadda ayaa xustay in ku dhowaad 4,000 muwaadin Soomaaliyeed dib loogu soo celiyay dalka saddexdii sano ee la soo dhaafay, taas oo qayb ka ah dadaallada joogtada ah ee lagu badbaadinayo muwaadiniinta Soomaaliyeed ee ku nool xaalado nugul dibadda.