Muqdisho (Dawan)- Waxaa la filayaa in dufcaddii ugu horreysay ee muwaadiniin Soomaali ah oo laga masaafuriyay Mareykanka, kuwaas oo tiradooda lagu qiyaasay 500 illaa 800 qof inay toddobaadyada soo socda soo gaaraan magaalada Muqdisho, iyadoo la filayo in diyaaraddii ugu horreysay ay soo degto dabayaaqada Janaayo ama bilowga Febraayo, sida ay ilo xog ogaal ah u sheegeen Dawan Media
Ilo xog ogaal ah oo ku sugan Soomaaliya iyo Mareykanka ayaa xaqiijiyay in dufcaddii ugu horreysay ee muwaadiniin Soomaali ah oo laga masaafurinayo Mareykanka ay ku soo wajahan yihiin dalka toddobaadyada soo socda, xilli ay socdaan diyaargarow ku aaddan habaynta keenistooda iyo qaabilaaddooda.
Ilaha xog ogaal ah, oo codsaday inaan magacyadooda la shaacin sababo la xiriira xasaasiyadda arrinta, ayaa sheegay in qorsheyn lagu wado hab-raac isku-duuban oo lagu maareynayo imaatinka dadka la masaafurinayo, inkastoo aan weli la shaacin jadwal rasmi ah oo ku saabsan taariikhda iyo tirada duulimaadyada.
Arrintan ayaa imanaysa xilli Mareykanku adkeeyay siyaasadaha la xiriira socdaalka, gaar ahaan muwaadiniinta Soomaaliyeed, kadib go’aanka Washington ay ku soo afjartay barnaamijka Ilaalinta Ku-meelgaarka ah (Temporary Protected Status – TPS) ee Soomaaliya, kaas oo la filayo inuu si rasmi ah u dhaqan galo 17-ka Maarso 2026.
Maxaan ognahay ilaa iyo hadda ?
