Muqdisho (Dawan)- Soomaaliya oo leh ku dhowaad 8.9 milyan oo hektar oo dhul beereed ah, ayaa hadda doonaysa iney kordhiso wax-soo-saarka beeraha, sare u qaado tayada dalagyada, isla markaana abuuro fursado cusub oo maalgashi.
Arrintan ayaa ka mid ahayd qodobadii looga hadlay Shirweynaha Maalgashiga Cuntada iyo Beeraha 2026, oo maanta lagu daahfuray magaalada Muqdisho, waxaana soo qabanqaabisay Wasaaradda Beeraha iyo Waraabka Soomaaliya.
Shirweynaha waxaa si rasmi ah u daahfuray Ra’iisul Wasaaraha Soomaaliya, Xamsa Cabdi Barre, waxaana ka qeyb galay wasiirro ka tirsan Xukuumadda Federaalka, oo ay ka mid yihiin wasiirrada Beeraha, Maaliyadda, Ganacsiga iyo Deegaanka iyo Isbeddelka Cimilada.
Waxaa sidoo kale ka qeyb galay hay’ado caalami ah iyo dhinacyada daneeya horumarinta beeraha, oo ay ka mid tahay Hay’adda Cunnada Adduunka ee WFP.
Shirku wuxuu diiradda saarayaa dhowr qodob oo muhiim u ah horumarinta wax-soo-saarka gudaha, kuwaas oo ay ka mid yihiin maalgelinta waraabka iyo kaabayaasha beeraha, horumarinta silsiladaha qiimaha iyo warshadaynta dalagyada, iyo maalgelinta beeraha u adkaysan kara saameynta isbeddelka cimilada.
Ra’iisul Wasaare Xamsa Cabdi Barre ayaa sheegay in Soomaaliya aysan sii wadi karin xaaladda ay hadda ku jirto ee ku-tiirsanaanta cuntada dibadda laga keeno.
“Soomaaliya waa inay ka gudubtaa inay cuntadeeda ka soo dhoofsato dibadda, waa inay u gudubtaa inay wixii ay cuni lahayd gudaha dalka ka soo saarto,” ayuu yiri Ra’iisul Wasaaruhu.
