Daaru-Salaam (Dawan)— Soomaaliya ayaa ka qaybgalaysa shirweynaha 12-aad ee dhinacyada Heshiiska Nairobi Convention (COP12), oo diiradda lagu saarayo ilaalinta deegaanka badda iyo xeebaha, wax ka qabashada saameynta isbeddelka cimilada iyo horumarinta dhaqaalaha buluugga ah ee gobolka Galbeedka Badweynta Hindiya.
Wafdi uu hoggaaminayo Wasiirka Deegaanka iyo Isbeddelka Cimilada ee dowladda federaalka Soomaaliya, Sareeye Guud Bashiir Maxamed Jaamac, ayaa dalka uga qaybgalaya shirkan oo ka dhacaya magaalada Daaru-Salaam ee Tanzania, intii u dhexeysay 6-dii iyo 9-kii Oktoobar 2026.
Shirweynahan oo labadii sanaba mar la qabto, isla markaana ah madasha ugu sarreysa ee go’aan-qaadashada Heshiiska Nairobi Convention, ayaa kulmiya dalalka gobolka si ay uga wada hadlaan xoojinta ilaalinta iyo maaraynta khayraadka badda iyo xeebaha, iyo wax ka qabashada caqabadaha deegaanka.
Ajandaha shirka waxaa sidoo kale ka mid ah xoojinta iskaashiga dalalka gobolka, yaraynta saameynta isbeddelka cimilada iyo horumarinta dhaqaalaha buluugga ah, oo door ka qaadan kara kobaca dhaqaalaha iyo ka faa’iidaysiga waara ee khayraadka badda.
