Soomaaliya oo ka qeybgashay Shirweynaha Maamulayaasha Isgaarsiinta

Maalintii koowaad ee shirka, Agaasimaha Guud ee Hay’adda Isgaarsiinta Qaranka, Mustafa Yasin Sheikh, ayaa ka qeybgalay kulanka madaxda hay’adaha maamulayaasha isgaarsiinta, kaas oo looga hadlay mudnaanta iyo caqabadaha horyaalla nidaamka dhijitaalka ah ee caalamka.

Intii uu socday fadhiga, Agaasimaha Guud ayaa ka hadlay shuruudaha loo baahan yahay si loo hirgeliyo “regulatory sandboxes”, oo ah hab tijaabo ah oo hay’adaha nidaaminta u oggolaanaya in adeegyo cusub lagu tijaabiyo jawi sharciyeed oo xaddidan ka hor inta aan si buuxda suuqa loogu fasixin.

Hay’adda Isgaarsiinta Qaranka ayaa sheegtay in ka qeybgalka madashan uu qeyb ka yahay dadaallada lagu xoojinayo nidaamka isgaarsiinta Soomaaliya, laguna horumarinayo adeegyada dhijitaalka ah ee dalka, iyadoo la eegayo baahida loo qabo isku xirnaan, amni, hal-abuur iyo ka qeybgal bulsho oo ballaaran.