Muqdisho (Dawan) — Dowladda Federaalka Soomaaliya ayaa karantiishay muwaadin Soomaaliyeed oo la xaqiijiyey inuu la soo safray muwaadin Kenyan ah oo la sheegay inuu cudurka Ebola ugu geeriyooday magaalada Nairobi, iyadoo muwaadinka Soomaaliyeed la geeyey xarun caafimaad oo ku taalla Muqdisho, sida ay sheegtay Wasaaradda Caafimaadka iyo Daryeelka Bulshada ee Soomaaliya.
War-saxaafadeed ay Wasaaraddu soo saartay 12-ka October 2026 ayay ku sheegtay in muwaadinka si ammaan ah loo karantiilay saacaddu markay ahayd 11:00 subaxnimo, loona gudbiyey Xarunta Karantiilka iyo Daaweynta Cudurka Ebola ee Isbitaalka Forlanini ee Muqdisho, si loo qiimeeyo xaaladdiisa caafimaad.
Wasaaraddu waxay sheegtay in Xafiiska Soomaaliya ee Xeerarka Caafimaadka Caalamiga ah (IHR) uu 10-kii October ogeysiis rasmi ah ka helay dhiggiisa Uganda, kaas oo ku saabsanaa muwaadinka Soomaaliyeed iyo muwaadin Kenyan ah oo kasoo safray Jamhuuriyadda Dimuqraadiga ah ee Congo (DRC), iyagoo soo maray Uganda.
Sida xogta ay Uganda soo gudbisay tilmaamayso, labada qof ayaa wada deggenaa hal hoteel, waxayna wada raaceen gaari u qaaday Garoonka Diyaaradaha Entebbe ee Uganda.
Labada qof ayaa markii dambe u kala safray Nairobi iyo Muqdisho. Muwaadinka Soomaaliyeed ayaa Muqdisho usoo maray Addis Ababa, halka muwaadinka Kenyan-ka ah uu u safray Kenya, kadibna la xaqiijiyey inuu 5-tii October 2026 ku geeriyooday Nairobi, iyadoo warbixintu sheegtay in geeridiisa lala xiriiriyey cudurka Ebola.
Wasaaradda Caafimaadka ayaa sheegtay in xogta Uganda laga helay ay ka mid ahaayeen magaca muwaadinka Soomaaliyeed, lambarka baasaboorkiisa, faahfaahinta duulimaadkiisa iyo lambarka kursigii uu diyaaradda ka fadhiyey, taas oo fududeysay raadraaciisa.
Kadib kulan degdeg ah oo hoggaanka Wasaaradda Caafimaadku yeeshay 11-kii October, ayaa Hay’adda Socdaalka laga codsaday inay xaqiijiso soo gelitaanka muwaadinka iyo halka uu dalka kaga sugan yahay.
