Nairobi (Dawan) – Dowladda Federaalka Soomaaliya ayaa ku biirtay dadaallada gobolka ee lagu xoojinayo iskaashiga iyo mideynta xeerarka dhowrista xogta ee qaaradda Afrika, iyadoo mas’uuliyiin ka socday Hay’adda Dhowrista Xogta Dadweynaha ay ka qaybgaleen shir iyo tababar socday muddo shan maalmood ah oo lagu qabtay magaalada Nairobi.
Shirkan ayaa isu keenay mas’uuliyiin ka socday hay’adaha dhowrista xogta ee dalal ay ka mid yihiin Soomaaliya, Kenya, Nigeria, Koonfur Afrika, Liberia, Malawi iyo Lesotho, kuwaas oo is dhaafsaday aqoon, khibrado iyo hababka ugu wanaagsan ee lagu hirgelin karo ilaalinta xogta shakhsiga ah.
Doodaha ayaa diiradda lagu saaray xoojinta iskaashiga hay’adaha dhowrista xogta, waafajinta qaab-dhismeedka sharciyeed iyo nidaamyada lagu maamulo xogta, si loo abuuro hannaan mideysan oo kor u qaada kalsoonida iyo amniga xogta ee Afrika.
Shirkan waxaa si wadajir ah u soo qabanqaabiyey Midowga Yurub, Midowga Afrika iyo Hay’adda Iskaashiga Caalamiga ah ee Jarmalka, iyadoo qayb ka ah dadaallada lagu xoojinayo maamulka xogta iyo kobcinta awoodda hay’adaha ka shaqeeya dhowrista xogta ee qaaradda.
Hay’adda Dhowrista Xogta Dadweynaha Soomaaliya ayaa sheegtay in ka qaybgalka barnaamijkan uu muujinayo dadaallada socda ee lagu horumarinayo awoodda hay’adda, lagu ballaarinayo iskaashiga caalamiga ah, isla markaana lagu hirgelinayo heerarka caalamiga ah ee dhowrista xogta.
