Muqdisho (Dawan) – Dowladda Federaalka Soomaaliya ayaa markii ugu horreysay si rasmi ah u shaacisay in diyaaradaha dagaalka ee F-16 ee Jamhuuriyadda Türkiye ay ka qeyb qaateen duqeyn ka dhacday gudaha Soomaaliya, taas oo lagu dilay ilaa 35 dagaalame oo ka tirsanaa Al-Shabaab. War-saxaafadeed ay soo saartay Wasaaradda Gaashaandhigga Soomaaliya ayaa lagu sheegay in Ciidanka Xoogga Dalka Soomaaliyeed, oo kaashanaya ciidamada Türkiye, ay subaxnimadii Talaadada duqeymo dhanka cirka ah ka fuliyeen deegaanka Godey ee gobolka Shabeellaha Hoose, iyagoo adeegsanaya diyaaradaha dagaalka ee F-16. Sida ay Wasaaraddu sheegtay, duqeymaha ayaa lagu bartilmaameedsaday godad, bakhaarro hub iyo goobo gabaad u ahaa dagaalamayaasha Al-Shabaab, waxaana lagu dilay ku dhowaad 35 xubnood oo ka tirsanaa kooxda, halka in ka badan 20 kale ay ku dhaawacmeen. War-saxaafadeedka ayaa sidoo kale lagu sheegay in qaraxyo waaweyn oo isdaba joog ah ay ka dhaceen goobta la duqeeyay, taas oo muujinaysa in halkaasi loo adeegsan jiray kaydinta hubka, walxaha qarxa iyo saadka ay kooxdu isticmaasho. Wasaaraddu waxay intaa ku dartay in goobta ay ku sugnaayeen dagaalamayaal iyo gaadiid laga soo buuxiyay walxaha qarxa, kuwaas oo sida lagu sheegay loo diyaarinayay in lagu fuliyo weerarro lagu waxyeelleynayo shacabka rayidka ah. Wasaaradda Gaashaandhigga ayaa uga mahadcelisay saaxiibbada caalamiga ah ee Soomaaliya taageerada ay ka geystaan la-dagaallanka Al-Shabaab, iyadoo xustay in iskaashiga noocaas ahi uu qeyb ka yahay dadaallada lagu ciribtirayo kooxda. Gabagabadii, Wasaaraddu waxay xaqiijisay in Ciidanka Xoogga Dalka Soomaaliyeed ay sii wadi doonaan howl-gallada lagu beegsanayo hoggaamiyeyaasha iyo dagaalamayaasha Al-Shabaab ilaa laga ciribtiro khatarta ay ku hayaan amniga dalka iyo shacabka Soomaaliyeed.
Maqaalka waa la soo dejinayaa...
