Muqdisho (Dawan)— Dowladda Federaalka Soomaaliya ayaa shaacisay qorshe lagu aasaasayo jaamacad farsamo sannadkan, taas oo loogu talagalay in ardayda lagu baro xirfado u suurtagelinaya inay shaqaystaan marka ay waxbarashada dhammaystaan, sida uu sheegay Wasiirka Waxbarashada Soomaaliya oo ka hadlay dood-cilmiyeed heer wasiir ah oo lagu qabtay Shirweynaha Bulshada Bariga Afrika ee EACON 2026, magaalada Muqdisho.
Wasiirka ayaa sheegay in jaamacadda cusub ay diiradda saari doonto waxbarashada farsamada iyo tababarrada xirfadeed, si ardayda ka qalinjabisa ay u yeeshaan aqoon iyo xirfado ay kaga faa'iidaysan karaan fursadaha shaqo.
“Sannadkan, sida ay dowladdu ku dhawaaqday, waxaa la aasaasayaa jaamacad Technical University la yiraahdo, oo loogu talagalay in waxbarasho farsamo, waxbarasho abuuri karta qofka markii uu ka soo baxo inuu ku shaqaysto,” ayuu yiri Wasiirku. Waxa uu intaas ku daray in dowladda ay sidoo kale qorshaynayso dhiirrigelinta machadyada iyo kulliyadaha farsamada ee ka jira qaybaha kala duwan ee dalka, si loo ballaariyo fursadaha waxbarashada xirfadeed.
Wasiirka ayaa sheegay in qorshayaashani ay qayb ka yihiin Qorshaha Isbeddelka Qaranka (National Transformation Plan), oo waxbarashada iyo horumarinta xirfadaha u aqoonsanaya arrimo muhiim u ah horumarka dalka.
