Shabeellaha Hoose (Dawan) – Wasaaradda Gaashaandhigga Soomaaliya ayaa maanta oo Khamiis ah sheegtay in 27 ka tirsan Al-Shabaab lagu dilay duqeymo wadajir ah oo ka dhacay gobolka Shabeellaha Hoose muddo laba maalmood ah.
Wasaaraddu waxay sheegtay in duqeymaha la fuliyay 1-dii iyo 2-dii Luulyo, ayna si wadajir ah u fuliyeen Ciidanka Xoogga Dalka Soomaaliyeed iyagoo kaashanaya saaxiibbada caalamiga ah.
Sida wasaaradda ay sheegtay duqeymaha ayaa lagu bartilmaameedsaday fariisimo ay Al-Shabaab ku lahaayeen deegaannada Tawakal, Nuun Garre iyo Ugunji ee gobolka Shabeellaha Hoose.
Sida ay sheegtay Wasaaradda Gaashaandhigga, duqeymahaas waxaa sidoo kale lagu dhaawacay tobannaan kale oo ka tirsan Al-Shabaab.
