Muqdisho (Dawan)— Wasaaradda Gaashaandhigga Soomaaliya ayaa sheegtay in laba dhallinyaro ah oo xoolo-dhaqato ah ay 17-kii Agoosto 2026 degmada Ruunirgood ee gobolka Shabeellaha Dhexe ku dileen Xasan Calasow Raage, oo loo yaqaannay “Xasan Xusuleey”, kaas oo ay ku tilmaantay mid ka mid ah horjoogayaasha ugu halista badnaa Al-Shabaab ee ka howlgala gobolka.
Sida ay sheegtay Wasaaradda Gaashaandhigga, kadib dilka horjoogaha, labada dhallinyaro ah ayaa ka qaatay qori AK-47 ah iyo rasaastii uu watay.
Xasan Calasow Raage, oo 50 jir ahaa kuna dhashay degmada Ruunirgood, ayaa sida Wasaaraddu sheegtay ahaa horjoogaha gaadiidka ee Al-Shabaab ee gobolka Shabeellaha Dhexe, waxaana uu hore u soo noqday madaxa kooxda u qaabilsan Sakawaadka degmada Ruunirgood.
