Soomaaliya oo si rasmi ah u bilowday qodista ceelkii ugu horreeyay ee shidaal

Muqdisho (Dawan) — Waxaa si rasmi ah loo soo dhaweeyay markabka Cagri Bey, kaas oo loo asteeyay inuu noqdo markabkii qodi lahaa ceelkii ugu horreeyay ee shidaal ee Soomaaliya.

Munaasabadda soo dhoweynta ayaa ahayd mid si weyn loo agaasimay, waxaana ka soo qeyb galay mas’uuliyiin sare oo ka tirsan dowladda Soomaaliya iyo wakiillo ka socday dowladda Turkiga.

Mas’uuliyiinta ayaa munaasabaddan ku tilmaamay mid taariikhi ah oo muddo dheer la sugayay. Wasiirka Gaashaandhigga, Axmed Macallin Fiqi, ayaa sheegay in maalintan ay tahay mid riyo ahayd oo hadda rumoowday.

“Waa maalin taariikhi ah; waa maalin ay dad badan oo Soomaaliyeed oo dunida ku kala nool jeclaan lahaayeen inay goobjoog ka noqdaan. Kuwa noolna waxay u tahay riyo muddo dheer ay ku riyoonayeen oo maanta xaqiiqo noqotay,” ayuu yiri wasiirku.

Dhankiisa, Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xusay in mashruucan uu soo maray caqabado iyo dhibaatooyin badan, balse ugu dambeyn lagu guuleystay hirgelintiisa.

“Dhibaatooyin badan, culeysyo iyo caqabado ayaa nala hor dhigay si naloo niyad jabiyo, balse ugu dambeyn waan ka gudubnay,” ayuu yiri madaxweynaha.

Sidoo kale, Wasiirka Kheyraadka Dabiiciga ah ee Turkiga, Alparslan Bayraktar, ayaa sheegay in heerkan la gaaray uu yahay natiijo ka dhalatay sannado badan oo sahamin shidaal ah.

Markabka Cagri Bey ayaa Soomaaliya u soo ambabaxay 15-kii Febraayo ee sanadkan, wuxuuna ku jiray safar muddo ah. Waa markab casri ah oo awood u leh inuu gaaro gunta hoose ee badda ilaa 12,000 mitir, taas oo ka dhigaysa mid ku habboon howlaha qodista shidaalka ee qoto dheer.

Markabkan waxaa ka horreeyay markabka sahminta shidaalka ee Oruç Reis, kaas oo xaqiijiyay jiritaanka shidaal laga helay Soomaaliya. Imaanshaha Cagri Bey ayaa hadda ka dhigan bilowga rasmiga ah ee howlaha qodista.

Ceelka ugu horreeya ee shidaalka laga qodayo dalka ayaa loo bixiyay Curad-1, waxaana laga qodayaa meel qiyaastii 372 KM u jirta xeebaha Muqdisho, inkastoo aan si rasmi ah loo shaacin jihada saxda ah ee uu kaga beegan yahay caasimadda.