Muqdisho (Dawan) – Dowladda Federaalka Soomaaliya ayaa soo dhoweysay is-afgaradka dhexmaray Mareykanka iyo Iran, iyadoo ku tilmaantay tallaabo wanaagsan oo lagu dhimayo xiisadda, laguna xoojinayo wadahadalka, isla markaana lagy taageerayo xasilloonida gobolka.
Warsaxaafadeed ay soo saartay Wasaaradda Arrimaha Dibadda iyo Iskaashiga Caalamiga ah ayaa lagu sheegay in Soomaaliya ay ku ammaaneyso labada dhinac inay doorteen waddada diblomaasiyadda iyo wadahadalka wax dhisaya si loo dejiyo xiisadaha loona xoojiyo nabadda.
Soomaaliya ayaa sheegtay in is-afgaradkan uu qeyb ka yahay dadaallo lagu dejinayo xiisadda u dhexeysa Washington iyo Tehran, isla markaana lagu abuurayo hannaan wadahadal oo lagu gaari karo heshiis rasmi ah.
Sida ay sheegayaan warbixinno caalami ah, qodobbada la xiriira is-afgaradka waxaa ka mid ah xabbad-joojin ku-meelgaar ah oo socon doonta 60 maalmood, dib-u-furidda marin-biyoodka Hormuz, fududeyn ku-meelgaar ah oo la xiriirta cunaqabateynta Mareykanka, iyo wadahadallo ku saabsan arrimaha Nukliyeerka.