Muqdisho (Dawan)— Iyadoo saadaashu muujinayso in xilliga Deyrta ee sanadkan Soomaaliya ay ka da’i karaan roobab ka badan heerka caadiga ah, dowladda iyo hay’adaha samatabixinta ayaa bilaabay diyaar-garow looga hortagayo fatahaadaha iyo saameynta kale ee ka dhalan karta roobabka.
Madasha Arrimaha Bani’aadantinimada Soomaaliya oo ay soo qabanqaabisay Hay’adda Maareynta Musiibooyinka Qaranka (SoDMA) ayaa maanta lagu qabtay magaalada Muqdisho, iyadoo diiradda lagu saaray sidii diyaar-garowga loogu beddeli lahaa tallaabooyin wax ku ool ah oo looga jawaabayo khataraha bani’aadantinimo ee soo food saari kara dalka.
Shirka oo halku-dhiggiisu ahaa “Digniin Hore ilaa Tallaabo Hore” ayaa xoogga lagu saaray xoojinta nidaamyada digniinaha hore, qorshayaasha gurmadka iyo iskaashiga hay’adaha kala duwan, si loo yareeyo khasaaraha ka dhalan kara roobabka iyo fatahaadaha la filayo.
Madashan oo saddexdii biloodba mar la qabto ayaa waxaa ka qeyb galay hay’adaha samatabixinta, wakiillo ka socday dowlad-goboleedyada, safiirro, xubno ka tirsan dowladda federaalka iyo masuuliyiin ka tirsan SoDMA.
