Soomaaliya oo WHO ka dalbatay in la ballaariyo taageerada caafimaadka

Croatia (Dawan) – Dowladda Federaalka Soomaaliya ayaa codsatay in la ballaariyo iskaashiga ay la leedahay Hay’adda Caafimaadka Adduunka (WHO), si loo xoojiyo taageerada la siinayo mudnaannada caafimaadka ee dalka iyo horumarinta adeegyada caafimaadka dadweynaha.

Dalabkan ayaa yimid kadib kulan laba geesood ah oo uu Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, kula yeeshay magaalada Dubrovnik ee dalka Croatia Agaasimaha WHO ee Gobolka Yurub, Hans Henri P. Kluge, intii uu socday Madasha Dubrovnik.

Sida lagu sheegay war-saxaafadeed ay soo saartay Wasaaradda Arrimaha Dibadda Soomaaliya, kulanka ayaa diiradda lagu saaray xoojinta iskaashiga u dhexeeya Soomaaliya iyo WHO, iyadoo si gaar ah looga wada hadlay ballaarinta taageerada farsamo iyo horumarinta mudnaannada caafimaadka dadweynaha ee dalka.

Labada mas’uul ayaa sidoo kale dib u xaqiijiyay sida ay uga go’an tahay sii wadista iskaashiga dhow ee u dhexeeya Soomaaliya iyo WHO, si loo taageero dadaallada lagu xoojinayo nidaamka caafimaadka dalka.

Wasaaraddu waxay xustay in iskaashigan la ballaariyay uu gacan ka geysan doono horumarinta adeegyada caafimaadka ee Soomaaliya iyo dhismaha nidaam caafimaad oo awood u leh inuu daboolo baahiyaha bulshada guud ahaan.