Muqdisho (Dawan)-Golaha Shacabka Baarlamaanka Federaalka Soomaaliya ayaa 26- September ansixiyey Hindise-Sharciyeedka Iskaashiga Garsoorka Caalamiga ah, kaas oo ujeeddadiisu tahay in la sameeyo hannaan sharci oo nidaamiya iskaashiga garsoorka Soomaaliya iyo hay’adaha garsoorka ee dalalka kale.
Hindise-sharciyeedka ayaa cod loo qaaday, waxaana oggolaaday 130 xildhibaan, halka sagaal xildhibaan ay diideen, laba xildhibaanna ay ka aamuseen, sida uu sheegay Guddoomiye Ku-xigeenka Labaad ee Golaha Shacabka, Cabdullaahi Cumar Abshirow, oo ku dhawaaqay natiijada codbixinta.
Hindise-sharciyeedkan waxaa soo gudbisay Wasaaradda Caddaaladda iyo Arrimaha Dastuurka, waxaana Golaha Shacabka horkeenay guddiga u qaabilsan arrimaha garsoorka iyo arrimaha diinta.
Hindise-sharciyeedku markii hore wuxuu ka koobnaa shan cutub, balse qaar ka mid ah qodobadiisa ayaa wax laga beddelay intii ay baarlamaanka ka socotay dooddiisu.
Maxaa uu sharcigu nidaaminayaa?
Si kooban, sharcigan wuxuu qeexayaa sida Soomaaliya ay ula shaqeyn karto dalalka kale marka kiis dambiyeed uu ku lug yeesho in ka badan hal waddan. Waxyaabaha uu nidaaminayo waxaa ka mid ah is-gargaarka sharciyeed, dhiibidda eedaysanayaasha ama dadka la xukumay iyo wareejinta maxaabiista xukuman.
Iskaashiga noocan ah wuxuu khuseyn karaa baaritaannada dambiyada, helitaanka caddeymaha, dacwadaha maxkamadaha iyo arrimaha la xiriira fulinta ama wareejinta xukunnada, iyadoo la raacayo habraacyada uu sharcigu dejinayo.
