Muqdisho (Dawan) - Dowladda Soomaaliya ayaa maanta dalka dib ugu soo celisay 160 muwaadiniin Soomaaliyeed ah oo muddo ku noolaa Yemen, kaddib markii xaaladaha amni iyo colaadaha ka jira dalkaasi ay saameeyeen nolosha dadka Soomaaliyeed ee halkaas ku nool.
Muwaadiniinta la soo celiyay oo tiradoodu tahay 160 qof ayaa waxaa ka mid ah 59 haween iyo carruur ah. Qaar ka mid ah dadkaasi ayaa Yemen ku noolaa muddo tobannaan sano ah, halka qaar kalena ay ku dhasheen dalkaasi, iyagoo markii ugu horreysay Soomaaliya imaanaya.
Soo celinta muwaadiniintan waxaa iska kaashaday Wasaaradda Arrimaha Dibadda iyo Hay’adda Qaramada Midoobay u qaabilsan qaxootiga, UNHCR, iyadoo tallaabadan ay qeyb ka tahay dadaallada lagu soo celinayo muwaadiniinta Soomaaliyeed ee ku nool dalalka ay ka jiraan colaadaha iyo xaaladaha amni ee adag.
