Gaarisa (Dawan)- Xildhibaankii hore ee deegaanka Lagdera, Maxamed Mukhtaar Shidiye, ayaa maanta oo Axad ah si rasmi ah codsigiisa ugu gudbiyay Golaha Odayaasha beesha Cawlahan, isaga oo muujiyay damaciisa la xiriira u tartamidda xilka Guddoomiyaha Gaarisa, islamarkaana ballanqaaday isbeddel dhab ah oo taabanaya adeegyada aasaasiga ah iyo maamulka deegaanka.
Munaasabadda gudbinta codsiga, oo ka dhacday hoteel ku yaalla magaalada Gaarisa, waxaa ka soo qeybgalay boqolaal taageerayaal ah. Halkaas ayuu Shidiye si faahfaahsan uga hadlay caqabadaha muddada dheer haysta bulshada magaalada, kuwaas oo ay ka mid yihiin biyo la’aan, adeegyo caafimaad oo liita, kaabayaal xumida waddooyinka , xaalufinta deegaanka, iyo shaqo la’aanta baahsan ee dhallinyarada.
“Dhallinyaro badan ma helaan shaqo, taas ayaana ku khasabtay inay dibadda ka raadiyaan nolol wanaagsan , halkaas oo qaarkood lagu xiro, lagu jirdilo, xitaa lagu dilo, sida ka dhacda Liibiya,” ayuu yiri Shidiye, kaddib gudbinta codsigiisa.
Shidiye, oo laba jeer hore u soo noqday xildhibaan Lagdera, ayaa sheegay inuu ka shaqeyn doono midnimada iyo isu keenidda shacabka Gaarisa, isaga oo aan u eegin kala duwanaansho qabiil ama aragti siyaasadeed. Wuxuu intaa ku daray in waayo-aragnimadiisa siyaasadeed ay tahay mid cad oo ay bulshadu wada ogtahay.
