Tirada Xildhibaannada laga mamnuucay fadhiyada Baarlamaanka oo kor u dhaafay 40

Muqdisho (Dawan) – 47 xildhibaan oo ka tirsan Golaha Shacabka iyo Aqalka Sare ee Soomaaliya ayaa laga mamnuucay ka qaybgalka kulammada soo socda ee baarlamaanka, kuwaas oo dhici doona seddexda fadhi ee ugu dambeya. Xildhibaanadaan ayaa si isku mid ah loogu eedeeyay ku xad-gudub nidaamka iyo hab-dhaqanka golaha intii lagu guda jiray saddexdii kulan ee ugu dambeysay.

Mamnuucidda ayaa ka dhalatay dhacdooyin dhowr ah oo qaab ahaan isku eg, kuwaas oo ka dhacay kulammada ugu dambeeyay ee labada aqal, kuna lug lahaayeen xildhibaanada Golaha Shacabka iyo Aqalka Sare.

Gudoonka Golaha Shacabka ayaa ku tilmaamay in arrimahani ay carqaladeeyeen shaqooyinkii golaha iyo hufnaanta sharci-dejinta.

Sida lagu sheegay war-saxaafadeed kasoo baxay Guddoonka Golaha Shacabka, 43 xildhibaan oo ka tirsan Golaha Shacabka iyo 4 ka tirsan Aqalka Sare ayaa laga mamnuucay ka qaybgalka 12 kulan ee baarlamaanka.

Xildhibaanada ayaa diidanaa in golaha uu ka doodo wax-ka-beddelka iyo dhammaystirka dastuurka, gaar ahaan cutubyada 4 ilaa 9aad ee loo soo gudbiyay baarlamaanka.

Golaha Shacabka ayaa sidoo kale ka digay in la sameeyo carqalado kale oo ka hor imaanaysa shaqada golaha, iyadoo si adag loo ilaalinayo nidaamka iyo xeerarka shaqo ee golaha, xilli mucaaradku horay u sheegay in ay guutooyin xildhibaano ah soo diri doonaan si la mid ah dhacdooyinkii 3-da kulan ee ugu dambeyay.