Toddobo xisbi oo taageeray musharraxa JSP ee doorashada Koonfur Galbeed

Baydhabo (Dawan) – Xoghayaha Xisbiga SINCAD, Cabdifataax Xasan Afrax, ayaa sheegay in toddobo urur siyaasadeed oo ka qeyb galay doorashadii Koonfur Galbeed ay ku heshiiyeen inay taageeraan hal musharrax oo ay ku mideysan yihiin, kaas oo ah musharraxa madaxweynaha Koonfur Galbeed ee xisbiga JSP ee Aadan Maxamed Nuur.

Cabdifataax Xasan Afrax ayaa sheegay in ururradan siyaasadeed ay heshiiska gaareen kadib doorashadii dhacday 10-kii bishan, isla markaana musharraxiintii kale ay tanaasuleen si loo yeesho hal musharrax.

“Todobada urur siyaasadeed waxay ku heshiiyeen inay yeeshaan hal musharrax, musharraxiintiina way uga tanaasuleen,” ayuu yiri Cabdifataax Xasan Afrax.

Wuxuu sheegay in nidaamka dimuqraadiyadeed iyo dastuurka uu dhigayo in aqlabiyadda ay go’aamiso natiijada siyaasadeed.

Xoghayaha Xisbiga SINCAD ayaa sidoo kale sheegay in musharraxa Xisbiga Cadaaladda iyo Wadajirka (JSP) uu helay taageerada ugu badan ee ururradii siyaasadeed ee ka qeyb galay doorashada Koonfur Galbeed.

“Musharraxa hoggaamiyaha Koonfur Galbeed ee xisbiga JSP wuxuu helay aqlabiyadda ururradii siyaasadeed ee ka qeyb galay doorashada,” ayuu yiri.

Cabdifataax Xasan Afrax ayaa sheegay in ururrada siyaasadeed ay matalayaan codadka shacabka Koonfur Galbeed ee ka kala yimid gobollada Baay, Bakool iyo Shabeellaha Hoose.

Sida uu sheegay xoghayuhu, taageerada ay muujiyeen ururradan siyaasadeed ayaa qeyb ka ah dadaallada lagu mideynayo codadka taageerayaasha musharraxa JSP inta lagu guda jiro geeddi-socodka doorashooyinka Koonfur Galbeed.