Galmudug (Dawan)— Urur-siyaasadeedka Towfiiq ayaa ka dalbaday Guddiga Madaxa-bannaan ee Doorashooyinka Qaranka iyo Soohdimaha inuu dib u eego go’aanka ururka looga reebay doorashada ku celiska ah ee Galmudug, taas oo loo qorsheeyay 30-ka Sebteembar.
Guddiga ayaa 14-kii Sebteembar soo saaray liiska 12 urur-siyaasadeed oo loo oggolaaday inay ka qayb galaan doorashooyinka isku sidkan ee golayaasha deegaanka iyo wakiillada Galmudug balse ururka siyaasadeedka Towfiiq kuma jirin liiskaas.
Guddiga ayaa sheegay in ururku aanu muddadii loo qabtay, oo ku ekeyd 12-kii Sebteembar, ku soo gudbin liiska musharaxiintooda. Sidaas darteed, guddigu wuxuu ururka u aqoonsaday mid aan diyaar u ahayn doorashada.
Hoggaamiyaha Towfiiq, Sheekh Maxamed Shaakir Cali Xasan, ayaa Sabtidii shir jaraa’id ku tilmaamay go’aanka guddiga “ku-takri-fal awoodeed”, isaga oo sheegay in ururkiisu diyaar u ahaa inuu ka qayb galo doorashada, balse laga saaray liiska tartamayaasha.
