Trump oo ku dhawaaqay dilka Khamenei

Washington (Dawan)- Madaxweynaha Mareykanka, Donald Trump, ayaa ku dhawaaqay in Hoggaamiyaha Sare ee Iiraan, Cali Khamenei, inuu ku dhintay duqeymihii ay Mareykanka iyo Israa’iil ki qaadeen Iiraan Sabtidii, hase yeeshee Tehran weli si rasmi ah uma xaqiijin warkan.

Trump ayaa sheegay in dhimashada Khamenei ay “cadaalad u tahay Mareykanka,” isagoo xusay in hoggaamiyaha Iiraan inuusan ka baxsan karin sirdoonka Mareykanka iyo nidaamyada raadraaca ee horumarsan.

Wuxuu intaas ku daray in howlgalka militari uu sii socon doono “inta loo baahdo” si loo xaqiijiyo nabad ka dhalata gobolka.

Warbaahinta Israa’iil ayaa hore u baahisay wararka la xiriira geerida Khamenei, balse ma jiro weli xaqiijin rasmi ah oo ka timid Tel Aviv.

Dhanka kale, warbaahinta iyo mas’uuliyiin Iiraaniyiin ah ayaa si adag u beeniyay sheegashada Trump, iyagoo ku tilmaamay “dagaal nafsi ah.”

Xubin ka tirsan guddiga amniga qaranka ee Baarlamaanka Iiraan ayaa sheegay in Khamenei uu nool yahay isla markaana hoggaaminayo go’aannada dagaalka. Sidoo kale, wakaaladda wararka Faris ayaa soo xigatay ilo ku dhow xafiiska hoggaamiyaha oo beeniyay geeridiisa.

Trump ayaa wareysiyo uu siiyay warbaahinta Mareykanka ku sheegay in uu ogyahay cidda hoggaamin doonta Iiraan haddii la xaqiijiyo geerida Khamenei, isaga oo xusay inay jiraan “hoggaan wanaagsan” oo suurtagal ah, balse ma faahfaahin

Xiisaddan ayaa kusoo beegmeysa iyadoo Mareykanka iyo Israa’iil ay wadaan duqeymo ballaaran oo ka dhan ah Iiraan, halka Tehran ay ku hanjabtay jawaab adag, taasoo sare u qaaday cabsi laga qabo in colaadda ay ku fido guud ahaan Bariga Dhexe.