Trump oo su’aal geliyay Aqoonsiga Somaliland: “Yaa garanaya Somaliland?

Washington ( Dawan)- Madaxweynaha Mareykanka Donald Trump ayaa shaki geliyay go’aanka Israa’iil ay ku aqoonsatay Somaliland, isaga oo sheegay in Washington aysan weli diyaar u ahayn inay raacdo tallaabadaas, taasoo dhalisay dood cusub oo ku saabsan mustaqbalka aqoonsiga Somaliland.

Wareysi uu siiyay wargeyska New York Post oo dhanka taleefanka ah, ayuu Trump ku muujiyay taxaddar ku aaddan arrintaas, isaga oo su’aal geliyay fahamka guud ee qaddiyadda Somaliland. “Yaa runtii garanaya waxa Somaliland ay tahay?” ayuu yiri Trump, taas oo si weyn u soo jiitay indhaha warbaahinta caalamka.

Hadalkan ayaa yimid wax yar kaddib markii Ra’iisul Wasaaraha Israa’iil Benjamin Netanyahu uu ku dhawaaqay aqoonsiga Somaliland, kaddib kulan muuqaal ah oo dhexmaray isaga iyo Madaxweynaha Somaliland Cabdiraxmaan Maxamed Cabdillaahi (Cirro), tallaabadaas oo dhalisay falcelinno diblomaasiyadeed oo ballaaran.

Trump ayaa cadeeyay in uusan qorshaynayn inuu si degdeg ah u aqoonsado Somaliland, isagoo xusay in uu u baahan yahay inuu marka hore daraaseeyo soo-jeedinta Netanyahu.

“Waxaan u baahanahay inaan ka fiirsado fikradda Netanyahu,” ayuu yiri Trump, taasoo muujinaysa kala duwanaansho u dhexeeya mowqifka Mareykanka iyo kan Israa’iil.

Inkasta oo Somaliland ay si diirran u soo dhoweysay aqoonsiga Israa’iil, islamarkaana Madaxweyne Cirro uu uga mahadceliyay Netanyahu tallaabadaas, haddana hadallada Trump ayaa hoos u dhigay rajadii xafladda diblomaasiyadeed ee ay Somaliland filaysay.

Dhanka kale, beesha caalamka ayaa si dhow ula socota horumarradan, iyadoo inta badan ururrada waaweyn ay si cad u diideen aqoonsiga Israa’iil. Ururka Jaamacadda Carabta, Ururka Iskaashiga Islaamka, Midowga Afrika, iyo ururro kale oo caalami ah ayaa ku adkaystay in Somaliland ay weli ka mid tahay Jamhuuriyadda Federaalka Soomaaliya.

Hadallada Trump ayaa loo arkaa dharbaaxo ku dhacday dadaallada Somaliland ee ay ku raadinayso aqoonsi caalami ah. Inkasta oo Israa’iil ay noqotay dalkii ugu horreeyay ee qaada tallaabadan, haddana Israa’iil lafteedu weli aqoonsi kama haysato dalal badan oo gobolka ah, arrintaas oo sii wiiqaysa miisaanka siyaasadeed ee aqoonsiga ay siisay Somaliland.

Somaliland ayaa muddo dheer ku hawlanayd dadaallo ay ku doonayso aqoonsi caalami ah, balse Mareykanka oo ka mid ah quwadaha ugu waaweyn dunida ayaan weli si rasmi ah u aqoonsan.

Haddii Washington aysan raacin waddada Israa’iil, rajada Somaliland ee helitaanka aqoonsi ballaaran ayaa weli sii fogaan karta.