Ankara (Dawan ) – Dowladda Turkiga ayaa beenisay eedeymo sheegaya inay faragelin ku hayso arrimaha siyaasadda gudaha Soomaaliya, iyadoo sheegtay in wararka la xiriirinaya ciidamada Turkiga ee Soomaaliya iyo xiisadaha siyaasadeed ay yihiin “kuwa gebi ahaanba aan sal iyo raad lahayn.”
War-saxaafadeed ay Talaadadii soo saartay Xarunta Turkiga ee La-dagaallanka Wararka Been Abuurka ah ayaa lagu sheegay in wararka lagu faafiyay baraha bulshada ee ku saabsan in Turkigu adeegsanayo ciidamadiisa Soomaaliya si loo cabburiyo mucaaradka ama loo taageero dhinac siyaasadeed gaar ah ay yihiin kuwo been ah.
“Ciidamada Turkiga ee ku sugan Soomaaliya wax lug ah kuma laha geeddi-socodka doorashooyinka Soomaaliya ama arrimaha siyaasadda gudaha,” ayaa lagu yiri war-saxaafadeedka.
Dowladda Turkiga ayaa sheegtay in iskaashiga ay la leedahay Soomaaliya uu yahay mid waafaqsan sharciga caalamiga ah isla markaana diiradda saaraya amniga, xasilloonida iyo xoojinta hay’adaha dowladda Soomaaliya.
Sida lagu sheegay war-saxaafadeedka, howlaha ciidamada Turkiga ee Soomaaliya waxay ku wajahan yihiin dib-u-habeynta Ciidanka Xoogga Dalka Soomaaliyeed, casriyeynta hay’adaha amniga iyo xoojinta awoodda la dagaallanka argagixisada.
