Antalya (Dawan)- – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa Arbacadii sheegay in maalgelinta cimiladu tahay “waajib, ee aysan ahayn sadaqo”, isaga oo dalalka horumaray ugu baaqay inay fuliyaan ballanqaadyadooda. Hadalkan ayuu ka jeediyay shir-madaxeedka hoggaamiyeyaasha ee shirka COP31.
“Qodobka 9-aad ee Heshiiska Paris wuxuu dhigaya in dalalka horumaray ay bixiyaan maalgelinta cimilada,” ayuu yiri madaxweynuhu. Wuxuu intaas ku daray in dalalka soo koraya ee ay saameeyeen isbeddellada cimiladu aysan Antalya u iman inay raalli-gelin raadiyaan, balse ay dalbanayaan in la fuliyo ballanqaadyadii ay si iskood ah u qaadeen dalalka mas’uuliyadda ugu weyn ka leh isbeddelka cimilada.
Xasan Sheekh ayaa sheegay in Soomaaliya ay mas’uul ka tahay 0.09% oo keliya qiiqa hawada lagu sii daayo adduunka, balse dadkeedu ay ka mid yihiin kuwa sida weyn u saameeyaan qiiqa ka dhasha dalalka kale. Wuxuu tusaale u soo qaatay abaartii dalka ka jirtay intii u dhexeysay 2020 iyo 2023, oo uu ku tilmaamay tii ugu muddada dheerayd muddo 40 sano ah, iyo fatahaadihii ka dhashay El Niño ee 2023, kuwaas oo saameeyay in ka badan laba milyan oo qof.