London (Dawan)-Dowladda Ingiriiska ayaa Soomaaliya ugu yaboohday £5 milyan, oo u dhiganta qiyaastii $6.6 milyan, si looga sii diyaar garoobo fatahaado suurtagal ah xilliga roobabka Deyrta ee Oktoobar ilaa Diseembar, sida ay manata oo khamiis ah sheegtay Safaaradda Ingiriiska ee Muqdisho.
Dhaqaalaha ayaa lagu xoojin doonaa nidaamyada digniinta hore, laguna caawin doonaa qoysaska u baahan inay u guuraan goobo ammaan ah. Waxa kale oo loogu talagalay in adeegyada caafimaadka, nafaqada iyo biyuhu sii shaqeeyaan haddii fatahaaduhu go’doomiyaan deegaanno.
Safaaradda ayaa sheegtay in ilaa 600,000 oo qof ay ka faa’iideysan karaan taageerada, oo ay ku jiraan dadka ku nool ku dhowaad 100 xero oo barakacayaal ah. Lacagta waxaa si siman loogu qaybin doonaa laba barnaamij oo hore u jiray. Caafimaad Plus, oo ay hoggaamiso Action Against Hunger, ayaa taageeri doona adeegyada aasaasiga ah iyo sii shaqaynta ilaa 71 xarumood oo caafimaad. RESTORE ayaa maalgelin doona diyaar garowga fatahaadaha, daadgureynta ku meel gaarka ah iyo kaalmo lacageed.
