Muqdisho (Dawan) — Hoggaamiyaha Xisbiga Ogaal, Cabdikariim Xasan Jaamac, ayaa magaalada Muqdisho kaga dhawaaqay inuu yahay musharrax u taagan xilka Madaxweynaha Dowladda Federaalka Soomaaliya doorashada soo socota, xilli ay weli socdaan wadahadallada ku saabsan nooca iyo waqtiga doorashada.
Munaasabad lagu qabtay Muqdisho ayuu Cabdikariim Xasan Jaamac ku soo bandhigay musharraxnimadiisa, isagoo sheegay in haddii loo doorto xilka madaxtinimada uu mudnaanta siin doono arrimo ay ka mid yihiin sugidda amniga, xoojinta caddaaladda, sareynta sharciga, la-dagaallanka musuqmaasuqa, kobcinta dhaqaalaha iyo dhismaha hay’ado dowladeed oo hufan.
Ku dhawaaqista musharraxnimada Cabdikariim Xasan Jaamac ayaa ka dhigan inuu si rasmi ah ugu biiray siyaasiyiinta muujiyey damacooda ku aaddan tartanka madaxtinimada Soomaaliya ee doorashada la filayo inay dhacdo sannadka 2026.
Taariikhdiisa siyaasadeed iyo shaqo
Qoraal taariikh-nololeed lagu soo bandhigay munaasabadda ayaa Cabdikariim Xasan Jaamac ku tilmaamay siyaasi iyo aqoonyahan khibrad u leh maamulka dowladda, waxbarashada iyo cilmi-baarista.
Waxa uu hore uga soo shaqeeyey Dowladda Federaalka Soomaaliya, isagoo soo qabtay xilal kala duwan oo ay ka mid yihiin Wasiirka Warfaafinta, Boostada iyo Isgaarsiinta, Agaasimaha Guud ee Madaxtooyada Soomaaliya iyo La-taliyaha Sare ee Madaxweynaha Soomaaliya.
Xilalkaas ayuu hayey xilli Soomaaliya ay ku jirtay marxalad kala-guur ah oo dib loogu dhisayay hay’adaha dowladda, nidaamka federaalka iyo hanaanka dowladnimada.
