Muqdisho (Dawan)– Qaar ka mid ah Fannaaniinta Soomaaliyeed ayaa Muqdisho isugu yimid bandhig lagu soo bandhigayo farshaxan, sawirro iyo filimaan, kaas oo lagu muujinayo dhaqanka iyo taariikhda Soomaaliya, iyadoo sidoo kale la doonayo in gudaha iyo dibadda lagu tuso sawir ka duwan kan inta badan Soomaaliya loogu yaqaan.
Bandhigga “Saddexleey” ayaa isu keenaya farshaxanno ay sameeyeen fannaaniinta Soomaaliyeed, waxaana uu qayb ka yahay barnaamij isku xiraya Muqdisho iyo bandhig farshaxan oo ka socda Venice, Talyaaniga, sida ay qabanqaabiyeyaashu sheegeen.
Barnaamijkan ayaa loogu talagalay in bulshada Soomaaliyeed loogu soo bandhigo bandhigga Venice, iyadoo qorshuhu yahay in qayb ka mid ah bandhigga dib loogu soo celiyo Soomaaliya, laguna soo bandhigo Matxafka Qaranka Soomaaliya kaddib marka bandhigga Venice uu soo xirmo bisha Nofeembar.
Cismaan Geedow Amir, Agaasimaha Matxafka Qaranka Soomaaliya, ayaa sheegay in barnaamijku yahay mid lagu doonayo in dhaqanka iyo taariikhda Soomaaliyeed loo bandhigo caalamka, isla markaana dhalinyarada Soomaaliyeed laga caawiyo inay si wanaagsan u fahmaan dhaqankooda iyo aqoonsigooda.
Wuxuu sheegay in dib loogu soo celiyo Soomaaliya bandhigga ka socda Venice ay muhiim tahay si dhalinyaradu ay ula falgalaan dhaqankooda iyo taariikhdooda.
“Waa barnaamij isku xiran oo u dhexeeya Venice iyo Muqdisho,” ayuu yiri Amir.
Farshaxamiiste Cabdinaasir Cabdikariim ayaa sheegay in shaqadiisa ay sidoo kale xiiseeyeen dad aan Soomaali ahayn.
