Baydhabo (Dawan)– Wasaaradda Gaashaandhigga Soomaaliya ayaa sheegtay in ciidamada dowladda ay dileen ku dhowaad 30 dagaalame oo weerar kusoo qaaday magaalada Baydhabo subaxnimadii maanta oo Isniin ah.
Sida lagu sheegay war-saxaafadeedka wasaaradda, weerarka ayaa dhacay abaare 5:00 subaxnimo, waxaana soo qaaday maleeshiyo ay wasaaraddu ku sheegtay inay ka tirsan yihiin Al-Shabaab iyo kuwo taabacsan madxaweynihii hore ee Koonfurgalbeed Cabdicasiis Laftagareen.
Wasaaraddu waxay sheegtay in ciidamada Xoogga Dalka ay si degdeg ah uga hortageen weerarka, iyagoo fashiliyay qorshihii kooxaha weerarka soo qaaday ee ahaa inay qalqal geliyaan amniga iyo xasilloonida magaalada Baydhabo.
Intii uu socday iska horimaadka, ciidamada dowladda ayaa dilay ku dhowaad 30 maleeshiyo, halka qaar kale ay dhaawacmeen, sida ay sheegtay Wasaaradda Gaashaandhigga.
Ciidamada dowladda ayaa sidoo kale gacanta ku dhigay hub iyo gaadiid ay adeegsanayeen kooxihii weerarka soo qaaday, sida lagu sheegay war-saxaafadeedka.