Muqdisho (Dawan) – Wasaaradda Qoyska iyo Horumarinta Xuquuqul Insaanka ee Soomaaliya ayaa dalbatay in si degdeg ah loo soo xiro dad lagu eedeeyay inay ku xadgudbeen gabar, kadib markii muuqaal la xiriira falkaas lagu faafiyay baraha bulshada.
Wasaaradda ayaa warsaxaafadeed ay soo saartay ku cambaareysay waxa ay ku tilmaantay xadgudub arxan-darro ah oo ka dhan ah sharafta, cirdiga iyo xuquuqda haweeneyda Soomaaliyeed.
Wasiirka Qoyska iyo Horumarinta Xuquuqul Insaanka, Khadiija Maxamed Al-Makhzoumi, ayaa sheegtay in falkaasi uu si cad uga hor imaanayo diinta Islaamka, dhaqanka suuban ee Soomaaliyeed iyo karaamada muwaadinka.
“Falkan wuxuushnimada ah waxa uu si cad uga hor imaanayaa diinteena Islaamka, dhaqanka suuban ee Soomaalida, xuriyadda, sharafta iyo cirdiga muwaadinka,” ayay tiri Wasiir Khadiija Maxamed Al-Makhzoumi.