Muqdisho (Dawan) - Wasiirka Ganacsiga iyo Warshadaha Soomaaliya, Jamaal Maxamed Xasan, ayaa ganacsatada ugu baaqay inay ballaariyaan wax-soo-saarka gudaha oo ay shaqooyin abuuraan, xilli uu booqday warshadda cabitaannada ee UBC Coca-Cola Somalia.
Wasiirka waxaa booqashada ku weheliyay wasiir ku-xigeenka wasaaradda, Cismaan Maxamed Cabdi, iyo maareeyaha guud ee hay’adda tayodhorka, Xaawo Axmed Xasan, sida ay shirkadda United Bottling Company sheegtay Sabtidii.
Jamaal ayaa sheegay in warshaddu ka gudubtay baaritaankii hay’adda tayodhorka, wuxuuna bogaadiyay maamulkeeda. Wuxuu sheegay in aqoonsiga tayadu uu macaamiisha gudaha iyo dibadda ka caawin karo inay ku kalsoonaadaan badeecadaha Soomaaliya lagu sameeyo.
Wasiirka ayaa UBC ku dhiirrigeliyay inay soo dalbato astaanta “Made in Somalia”.
