Xamse oo sheegay in Soomaalinimadu ku xiran tahay in qofku yahay Muslim

Muqdisho, 13 Abriil 2026 (Dawan)— Ra’iisul Wasaaraha Soomaaliya, Xamsa Cabdi Barre, ayaa Axaddii sheegay in aqoonsiga qaranka Soomaaliyeed uu si dhow ugu xiran yahay Islaamka, isla markaana hay’adaha milatarigu ay tahay in lagu saleeyo qiyamka iyo waxbarista diinta.

Hadalkan ayuu ka jeediyay munaasabad lagu xusayay sanad-guurada 66-aad ee Ciidanka Xoogga Dalka Soomaaliyeed (CXDS), taas oo ka dhacday xarunta taliska saadka ee Villa Baydhabo ee Muqdisho.

“Soomaaliga iyo Islaamka waa isku xiran yihiin; qofka aan Muslimka ahayn Soomaali ma aha,” ayuu yiri Xamsa, isaga oo isbarbardhig ku sameeyay dalal ay aqoonsiga iyo muwaadinnimadu ku xiran yihiin diin ama qoomiyad.

Wuxuu tusaale u soo qaatay Malaysia, isaga oo sheegay in aqoonsiga Malay-ga uu si dhow ugu xiran yahay Islaamka, isla markaana ka bixitaanka diinta ay saameyn karto xaaladda qofka.

“Annaga kiiskeenna, Islaamka iyo aqoonsiga Soomaalinimadu waa isku xiran yihiin,” ayuu yiri, isaga oo intaa ku daray in askartu ay tahay inay ka tarjumaan caqiidada iyo qiyamka Islaamka.

Ra’iisul Wasaaruhu wuxuu sheegay in hay’adaha milatarigu ay ku daraan waxyaabo diini ah, sida masaajidyo, culimo diini ah, iyo baridda Qur’aanka Kariimka ah iyo Xadiiska.