Xiriirka Kubadda Cagta Jabuuti oo taageeray in Infantino mar kale isku soo sharraxo FIFA

Jabuuti (Dawan) – Xiriirka Kubadda Cagta Jabuuti (FDF) ayaa sheegay inuu taageerayo musharraxnimada madaxweynaha FIFA, Gianni Infantino, ee mar kale u tartamaya hoggaanka kubadda cagta adduunka, sida lagu sheegay bayaan rasmi ah.

Xiriirka ayaa ku dhawaaqay inay si buuxda u garab taagan yahay Infantino kadib markii uu shaaciyay inuu u tartamayo xilka muddada 2027–2031, iyadoo arrintan lagu sheegay in ay timid xilli uu socday Shirweynaha 76-aad ee FIFA oo lagu qabtay Vancouver, Canada.

Bayaanka, oo lagu soo saaray magaca guddoomiyaha xiriirka iyo xubin ka tirsan Golaha FIFA, Suleiman Xasan Waberi, ayaa lagu ammaanay hoggaanka Infantino.

“Wax ka badan toban sano oo uu xilka hayay, Mr. Infantino wuxuu horseeday aragti horumarineed oo loo dhan yahay oo lagu kobcinayo kubadda cagta caalamka,” ayaa lagu yiri bayaanka.

Xiriirka Jabuuti ayaa sidoo kale xusay in barnaamijyada horumarineed ee FIFA ay gacan ka geysteen mashaariic dalka ka hirgalay, oo ay ka mid yihiin dhismaha garoomo macmal ah, aas-aaska akadeemiyooyin iyo xoojinta tartamada gudaha. Xiriirka ayaa intaas ku daray isuu sii wadi doono iskaashiga ay uu la leeyahay FIFA si loo horumariyo kubadda cagta, gaar ahaan ka-qaybgalka dhalinyarada iyo haweenka.

Taageeradan ayaa muujinaysa sida qaar ka mid ah xiriirrada kubadda cagta ay u garab taagan yihiin Infantino, iyadoo la eegayo doorashada soo socota ee FIFA.